ஏப்ரல் 6-ஆம் தேதி தமிழகத்தில் சட்டமன்ற தேர்தல் நடைபெறவிருக்கும் நிலையில் இன்னும் தேர்தலுக்கு ஒரு மாதம் மட்டுமே உள்ளது. இந்த நிலையில் அதிமுக மற்றும் திமுக கூட்டணி தரப்பில் பேச்சுவார்த்தைகள் விறுவிறுப்பாக நடைபெற்று வருகின்றன. அதிமுக கூட்டணியில் பாமகவுக்கு 23 தொகுதிகள் ஒதுக்கப்பட்டுள்ளது என்பது மட்டுமே உறுதி செய்யப்பட்டுள்ளது. அதேபோல் திமுக கூட்டணியில் மனிதநேய மக்கள் கட்சி மற்றும் முஸ்லிம் லீக் ஆகிய கட்சிகளுடன் மட்டுமே ஒப்பந்தம் செய்யப்பட்டுள்ளது.

இந்த நிலையில் திமுக கூட்டணியில் உள்ள காங்கிரஸ், மதிமுக, விடுதலை சிறுத்தைகள், கம்யூனிஸ்ட் ஆகிய கட்சிகள் பேச்சுவார்த்தை நடத்த இருப்பதாகவும் அதேபோல் அதிமுக கூட்டணியில் பாஜக, தேமுதிக, உள்ளிட்ட கட்சிகள் பேச்சுவார்த்தை நடத்த இருப்பதாகவும் கூறப்படுகிறது.

இந்த நிலையில் இன்று மதிமுக மற்றும் விடுதலை சிறுத்தைகள் கட்சிகள் தொகுதி பங்கீடு குறித்து இன்று பேச்சுவார்த்தைக்கு செல்ல இருந்த நிலையில் திடீரென இரண்டு கட்சிகளின் பிரதிநிதிகளும் பேச்சுவார்த்தைக்கு செல்லவில்லை என்று கூறப்படுகிறது.

இதனால் இந்த இரண்டு கட்சிகளும் திமுக கூட்டணியில் இருந்து விலக அதிக வாய்ப்பு இருப்பதாக தெரிகிறது. விடுதலை சிறுத்தைகள் கட்சி மற்றும் மதிமுக ஆகிய இரண்டு கட்சிகளும் இரட்டை இலக்கங்களில் தொகுதிகள் கேட்பதாகவும் தனி சின்னத்தில் போட்டியிட விரும்புவதாகவும் தெரிவித்ததாகவும், ஆனால் திமுக அதனை ஏற்கவில்லை என்றும் தகவல்கள் தெரிவிக்கின்றன.

நாம் அதிமுகவை தேடிச் செல்லவில்லை என்றும் அதிமுகதான் நம்மை தேடி பின்னால் வந்து கொண்டிருக்கிறது என்றும் தேமுதிகவின் சுதீஷ் பேசியுள்ளது பெரும் பரபரப்பை ஏற்படுத்தி உள்ளது.

அதிமுக கூட்டணியில் தேமுதிக இடம்பெறுமா? இடம்பெறாதா? என்ற சந்தேகம் ஆரம்பத்திலிருந்து இருந்து வந்தது. இந்த நிலையில் கூட்டணி குறித்த பேச்சுவார்த்தையை தொடங்கியபோது தேமுதிக கேட்ட தொகுதிகளில் இருந்து பாதிக்கும் குறைவாகவே அதிமுக தருவதாக கூறியது. அதுமட்டுமின்றி தேமுதிகவின் கோரிக்கையான ராஜ்யசபா தொகுதி என்ற பேச்சுக்கே இடமில்லை என்றும் தெரிவித்திருந்தது.

இந்த நிலையில் அதிமுக கூட்டணியிலிருந்து தேமுதிக வெளியேறும் நிலை ஏற்பட்டு உள்ளதாக அரசியல் வட்டாரங்கள் கூறுகின்றன. இந்த நிலையில் இன்று தேமுதிக ஆலோசனை கூட்டம் நடைபெற்றது. இந்த ஆலோசனை கூட்டத்தில் பேசிய எல்.கே.சுதீஷ் கடந்த 2011 ஆம் ஆண்டு நடந்த தேர்தலில் அதிமுக கூட்டணியில் நாம் இல்லை என்றால் இன்று அதிமுக என்ற கட்சியை இருந்திருக்காது என்றும் கூட்டணிக்காக அவர்களை தேடி நாம் செல்ல வில்லை என்றும் அவர்கள் தான் நம் பின்னாடி வந்து கொண்டிருக்கிறார்கள் என்றும் பேசியுள்ளார்.

கடந்த 2016ஆம் ஆண்டு நடந்த தேர்தலில் மக்கள் நலக்கூட்டணியில் போட்டியிட்ட தேமுதிக ஒரு தொகுதியில் கூட டெபாசிட் வாங்காத நிலையில் தேமுதிக இவ்வாறு பேசியிருப்பது அந்த கட்சியின் அழிவை காட்டுவதாக நெட்டிசன்கள் கருத்து கூறி வருகின்றனர்.

தமிழகம் உள்பட 5 மாநிலங்களில் தேர்தல் தேதி அறிவிக்கப்பட்டுள்ளதை அடுத்து தேர்தல் விதிமுறைகளை ஐந்து மாநிலங்களிலும் நடைமுறைக்கு வந்துள்ளன. அதுமட்டுமின்றி வாக்காளர்களுக்கு பணம் மற்றும் பரிசுப் பொருட்கள் கொடுப்பதை தவிர்க்கும் வகையில் தேர்தல் அதிகாரிகளின் பறக்கும் படை சோதனையிட்டு வருகின்றனர்

இந்த நிலையில் இந்த பறக்கும் படையினர் 4500 கோழிக்குஞ்சுகளை பறிமுதல் செய்ததாக வந்திருக்கும் தகவல் பெரும் பரபரப்பை ஏற்படுத்தி உள்ளது. குன்னூர் அருகே ஒரு குடும்ப அட்டைதாரர்களுக்கு 25 கோழி குஞ்சுகளை இலவசமாக அதிமுகவினர் வழங்கி வருவதாகவும் இதனை வாங்கிக் கொண்டு அதிமுகவுக்கு வாக்களிக்க வேண்டும் என்றும் கூறப்பட்டதாகவும் ஒரு தகவல் மிக வேகமாக பரவியது.

இந்த தகவல் தேர்தல் பறக்கும் படையினர்களுக்கும் வந்ததை அடுத்து உடனடியாக அந்த பகுதிக்கு சென்ற பறக்கும் படையினர் அதிமுகவினர் வைத்திருந்த 4500 கோழிக்குஞ்சுகளை பறிமுதல் செய்தனர்.

தேர்தலின்போது வாக்காளர்களுக்கு பணம் பரிசுப் பொருள்கள் கொடுப்பதுதான் கேள்விப்பட்டு இருக்கிறோம். ஆனால் தற்போது கோழிக்குஞ்சுகளை கொடுத்து வாக்கு கேட்கும் நிலைக்கு வந்து விட்டதே என்ற வருத்தம் தான் அனைவர் மத்தியிலும் எழுந்துள்ளது.