இந்தியாவில் சனிக்கிழமை ஒரே நாளில் 4.4 லட்சம் பேருக்கு கொரோனா சோதனை செய்யப்பட்டதில் 48,661 பேருக்கு கொரோனா தொற்று உறுதியாகியுள்ளது.

இதுவரை இந்தியாவில் 1,62,91,331 நபர்களுக்கு கொரோனா சோதனை செய்து, அதில் 13,85,522 பேருக்கு கொரோனா உறுதியாகி சிகிச்சை பெற்று வருகின்றனர். 8,85,576 நபர்கள் சிகிச்சை பெற்றுக் குணமடைந்து வீடு திரும்பியுள்ளனர்.

32,063 நபர்கள் இறந்துள்ளனர். 4,67,882 நபர்கள் சிகிச்சை பெற்று வருகின்றனர்.

தெரு கடை வைத்திருப்பவர்கள் கடன் பெற PM சிவநிதி (http://pmsvanidhi.mohua.gov.in/) என்ற புதிய செயலியை மத்திய அரசு அறிமுகம் செய்துள்ளது.

கொரோனாவால் தெரு கடைகளின் வியாபாரம் செய்தவர்களின் பொருளாதாரம் சரிந்தது. எனவே தெரு கடைகளின் வியாபாரத்தைச் சீர் செய்து, மீண்டும் தொழில் தொடங்க குறைந்த வட்டியில் 10 ஆயிரம் ரூபாய் வரை சிறு கடன் அளிப்பதாக மத்திய அரசு அறிவித்து இருந்தது.

அதன் பெயரில் கூகுள் பிளே ஸ்டோரில் உள்ள PM SVANidhi செயலியைப் பதிவிறக்கம் செய்து, தேவையான ஆவணங்களைச் சமர்ப்பித்து ஒரு வருட தவணையில் 10 ஆயிரம் ரூபாய் வரை கடன் பெற முடியும்.

இந்த திட்டத்தின் கீழ் கடன் பெற்று, அதன் தவணையைச் சரியான நேரத்தில் திருப்பி செலுத்தி வந்தால் 7 சதவீதம் வரை வட்டி மானியமாக வங்கி கணக்கில் திரும்ப அளிக்கப்படும்.

அதுமட்டுமல்லாமல், இந்த தெரு கடை வியாபாரிகள் டிஜிட்டல் பரிவர்த்தனைகள் மூலம் வியாபாரம் செய்யும் போது மாதம் 100 ரூபாய் ஊக்கத்தொகையும் மத்திய அரசு வழங்குகிறது.

ஜூன் 1-ம் தேதி முதல் PM SVANidhi செயலி பயன்பாட்டில் உள்ளதாகக் கூறப்படுகிறது. இதுபற்றி பல தெரு கடை வியாபாரிகளுக்குத் தெரியாது என்பதால், இந்த செய்தியை அவர்களுடன் பகிர்வதன் மூலம், அதிக வட்டிக்கு கடன் வாங்காமல் அவர்கள் பயன்பெறுவார்கள்.

அயோத்யாவில் ராமர் கோவில் கட்டுவதற்கான பூமி பூஜைக்கான அழைப்பு பிரதமர் மோடிக்கு ஸ்ரீ ராம் ஜன்ம பூமி தீர்த்த கேஷ்த்ரா அறக்கட்டளை விடுத்துள்ளது.

அயோத்யா ராமர் கோயில் – பாபர் மசூதி வழக்கு முடிவுக்கு வந்ததை அடுத்து ராமர் கோவில் விரைவில் கட்டப்படும் என்றும் கூறப்பட்டு வந்தது.

இந்நிலையில் ஜூலை 29 மற்றும் ஆகஸ்ட் 5 என இரண்டு தேதிகளில் ஏதேனும் ஒரு நாள் ராமர் கோவில் கட்டுவதற்கான பூமி புஜை செய்ய முடிவு செய்யப்பட்டுள்ளது. இந்த இரண்டு தேதிகளில் என்று பிரதமர் மோடியால் வர முடியுமோ அன்று ராமர் கோவில் பூமி பூஜை போடப்படும் என்று ஸ்ரீ ராம் ஜன்ம பூமி தீர்த்த கேஷ்த்ரா அறக்கட்டளையின் முக்கிய உறுப்பினர் கோவிந்த் கிரி மகாராஜ் தெரிவித்துள்ளார்.

பிரதமர் மோடி மட்டுமல்லாமல், உத்திர பிரதச முதல் யோகி ஆதித்யநாத் மற்றும் பிற முக்கிய தலைவர்களும் ராமர் கோவில் பூமி பூஜையில் பங்கேற்க வாய்ப்புள்ளதாகத் தகவல்கள் கூறுகின்றன.