2019-2020 நிதியாண்டுக்கான வருமான வரியைத் தாக்கல் செய்வதற்கான காலக்கெடு, 2020, டிசம்பர் 31 வரை நீட்டிப்படுவதாக, நிதி அமைச்சகம் சனிக்கிழமை அறிவித்துள்ளது.

முன்னதாக வருமான வரி தாக்கல் செய்வதற்கான ஜூலை 31-ம் தேதியிலிருந்து, நவம்பர் 30-ம் தேதி வரையில் நீட்டிக்கப்பட்டு இருந்தது.

தனிக்கை பார்க்க வேண்டிய கணக்குகளின் வருமான வரி தாக்கல் செய்வதற்கான காலக்கெடு 2021, ஜனவரி 31-ம் தேதி வரை நீட்டிக்கப்பட்டுள்ளது.

சர்வதேச பணப் பரிவர்த்தனை குறித்த அறிக்கையைத் தாக்கல் செய்வதற்கான காலக்கெடுவையும் நவம்பர் 30-ம் தேதியிலிருந்து 2021, ஜனவரி 31 வரை நீட்டித்துள்ளதாகத் தெரிவிக்கப்பட்டுள்ளது.

கொரோனா ஊரடங்கு காரணமாக ஆர்பிஐ 6 மாதங்கள் கடன் திட்டங்களின் தவணை செலுத்த அவகாசம் வழங்கியது.

ஆர்பிஐ வழங்கிய இந்த தவணை செலுத்துவதற்கான அவகாசம் ஆகஸ்ட் மாதம் முடிவடைந்த பிறகு, 6 மாத தவணைக்கும் சேர்த்து வட்டிக்கு வட்டி செலுத்த வேண்டும் என்று கூறியது சர்ச்சை ஆனது.

பின்னர் அதில் தலையிட்ட உச்ச நீதிமன்றம், ஊரடங்கு காலத்தில் கடன் தவணை செலுத்த வழங்கப்பட்ட கால அவகாசத்தில் செலுத்த வேண்டிய தொகைக்கு வட்டிக்கு வட்டி வசூலிக்கக் கூடாது என்று மத்திய அரசுக்கு உத்தரவிட்டது.

முதலில் அதற்குச் சாக்குப்போக்கு சொல்லித் தவிர்த்த மத்திய அரசு, உச்ச நீதிமன்றத்தின் அலுத்ததால் பணிந்தது. இந்நிலையில் ஊரடங்கு காலத்தில் கடன் தவணை செலுத்தக் கால அவகாசம் பெற்றவர்கள் செலுத்த வேண்டிய வட்டிக்கு வட்டி மற்றும் அப்போதும் கடன் தவணையைத் தவறாமல் செலுத்திய வாடிக்கையாளர்களுக்கும் சலுகையை வழங்க உள்ளதாக மத்திய அரசு அறிவித்துள்ளது.

அதன்படி 2020 மார்ச் 1 முதல் ஆகஸ்ட் 2020 வரையிலான காலகட்டத்தில், 2 கோடி ரூபாய்க்குக் கீழ் கடன் பெற்று அதற்கான தவணையைத் திருப்பி செலுத்த அவகாசம் பெற்றவர்கள் மற்றும் செலுத்தியவர்களுக்குச் சலுகை வழங்கப்பட உள்ளது.

மத்திய அரசின் இந்த கடன் திட்டங்களின் வட்டி தள்ளுபடி தனிநபர்கள் பெற்ற பர்சனல் லோன், வாகன கடன், வீட்டுக் கடன், கிரெடிட் கார்டு கடன், தவணை முறையில் வாங்கிய ஏசி, பிரிட்ஜ் என அனைத்துக்கும் பொருந்தும் என்று தெரிவிக்கப்பட்டுள்ளது. மேலும் சிறு குறு நிறுவனங்களும் 2 கோடி ரூபாய்க்கு கடன் பெற்று இருந்தால் இந்த வட்டி தள்ளுபடி சலுகையைப் பெற இயலும்.

மத்திய அரசின் இந்த கடன் திட்டங்களின் வட்டி வட்டி மற்றும் வட்டி தள்ளுபடி அறிவிப்பால், 6,500 கோடி ரூபாய் செலவாகும் என்று தெரிவிக்கப்பட்டுள்ளது.

இது கண்டிப்பாக வங்கியில் கடன் பெற்றவர்களுக்கான ஒரு தீபாவளி பரிசாகதான் இருக்கும்.

வெங்காய விலை உயர்வைக் கட்டுப்படுத்த, மத்திய அரசு வணிகர்களுக்கு புதிய கட்டுப்பாடுகளை விதித்துள்ளது.

சில்லறை வியாபாரிகள் இரண்டு டன் வெங்காயமும், மொத்த வியாபாரிகள் 25 டன் வரையிலும் வெங்காயத்தை இருப்பு வைக்கலாம் என்று மத்திய நுகர்வோர் அமைச்சகம் கட்டுப்பாடுகளை விதித்துள்ளது.

இந்த கட்டுப்பாடுகளால் வெங்காய விலை பதுக்கல் தடுக்கப்பட்டு தாராளமாகச் சந்தைக்கு விற்பனைக்கு வரும் என்று மத்திய அரசு கருதுகிறது.

முன்னதாக டிசம்பர் மாதம் வரையில் வெங்காய இறக்குமதிக்கு விதித்திருந்த கட்டுப்பாடுகளை மத்திய அரசு தளர்த்தியிருந்தது.

மேலும் தங்கள் வசம் இருந்த 1 லட்சம் மெட்ரிக் டன் வெங்காயத்தை மாநில அரசுகளுக்குப் பிரித்து வழங்கவும் மத்திய அரசு முன்வந்துள்ளது.

தமிழக அரசும் கூட்டுறவுச் சங்க காய்கறி கடைகளில் வெங்காயத்தைக் கிலோ 45 ரூபாய் என வாங்கிக்கொள்ள ஏற்பாடு செய்துள்ளது.

கடந்த 10 நாட்களில் 15 ரூபாயாக இருந்த கிலோ வெங்காயத்தின் விலை 100 ரூபாய் வரை உயர்ந்து இருப்பது குறிப்பிடத்தக்கது.