இந்தியாவின் மிகப் பெரிய வங்கியான எஸ்பிஐ கடன் திட்டங்கள் மீதான வட்டி விகிதத்தைக் குறைத்து அறிவித்துள்ளது, வாடிக்கையாளர்களை மகிழ்ச்சி அடையச் செய்துள்ளது.

இந்திய ரிசர்வ் வங்கி நேற்று வெளியிட்ட முக்கிய அறிவிப்பில், ரெப்போ வட்டி விகிதத்தை 0.75 சதவீதம் குறைத்து, 4.4 சதவீதமாக அறிவித்தது.

அதை தொடர்ந்து வங்கிகளும் கடன் திட்டங்கள் மீதான வட்டி விகிதத்தைக் குறைக்கும் என்று எதிர்பார்க்கப்பட்டது.

அதுபோலவே, எஸ்பிஐ வங்கி என அழைக்கப்படும் பாரத ஸ்டேட் வங்கி ஏப்ரல் 1 முதல் கடன் வட்டி விகிதத்தை 7.80 சதவீதத்திலிருந்து 7.05 சதவீதமாகக் குறைத்து அறிவித்துள்ளது.

ஆர்பிஐ அளித்த சலுகையை அப்படியே எஸ்பிஐ வங்கி வாடிக்கையாளர்களுக்கு அளித்துள்ளது. இதனால் எஸ்பிஐ வங்கி வாடிக்கையாளர்கள் 30 வருட தவணையில் வீட்டுக் கடன் வாங்கியிருந்தால், ஒரு லட்சம் ரூபாய்க்கு 52 ரூபாய் வட்டி குறையும்.

ஆனால், மறுபக்கம் எஸ்பிஐ வங்கியில் ஃபிக்சட் டெபாசிட் போன்ற திட்டங்களில் புதியதாக முதலீடு செய்பவர்களுக்கு 0.2 சதவீதம் முதல் 0.50 சதவீதம் வரை வட்டி விகித லாபம் சரியும். இது மார்ச் 28-ம் தேதி முதல் அமலுக்கு வருகிறது.

எனவே பிற வங்கிகளும், போட்டி காரணமாக விரைவில் வட்டி விகித குறைப்புகளை அறிவிப்பார்கள் என்று எதிர்பார்க்கப்படுகிறது.

சர்வதேசச் சந்தையில் கச்சா எண்ணெய் விலை 45 சதவீதத்திற்கும் அதிகமாகச் சரிந்துள்ளது. ஆனால் பொதுத் துறை எண்ணெய் நிறுவனங்கள் தொடர்ந்து 11வது நாளாக விலை குறைக்காமல் உள்ளனர்.

கச்சா எண்ணெய் விலை குறைந்ததால், பெட்ரோல், டீசல் விலை குறையும் என்று பார்த்தால், மத்திய அரசு கலால் வரியை உயர்த்தியது.

அதனால், மார்ச் மாதம் இதுவரையில் பெட்ரோல் 2.3 ரூபாயும் டீசல் 2.2 ரூபாயும் குறைந்துள்ளது. மத்திய அரசு கலால் வரியை உயர்த்தாமல் இருந்தால் இந்த விலை குறையும் 3 ரூபாயாக இருந்திருக்கும்.

எஸ்பிஐ வங்கி அண்மையில் கச்சா எண்ணெய் விலை 30 டாலர் பேரல் எனில், பெட்ரோல் டீசல், விலை 10 முதல் 12 ரூபாய் வரை குறையும் என்று கணித்து இருந்தது.

கொரோனா வைரஸ் காரணமாக விடுக்கப்பட்டுள்ள 21 நாட்கள் முடக்கத்தால், பெட்ரோல், டிசல் மீதான தேவை சரிந்துள்ளது. அதுவும் இந்த விலை குறைப்பு ஏற்படாமல் இருக்கக் கரணமாக உள்ளது. எப்போது இந்த நாடு தழுவிய முடக்கம் முடியுமோ, அப்போது வரை பெட்ரோல், டீசல் விலையில் பெரிய அளவில் மாற்றம் இருக்காது என்று கூறப்படுகிறது.

இன்று சென்னையில் பெட்ரோல் விலை 72.28 ரூபாய் லிட்டர் என்றும், டெல்லியில் 69.29 ரூபாயாகவும் மும்பையில் 73.30 ரூபாயாகவும் பெங்களூரூவில் 71.97 ரூபாயாகவும் விற்கப்பட்டு வருகிறது. டீசல் விலை சென்னையில் 65.71 ரூபாயாகவும், டெல்லியில் 62.29 ரூபாயாகவும் மும்பையில் 65.21 ரூபாயாகவும் பெங்களுருவில் 64.41 ரூபாயாகவும் விற்பனையாகி வருகிறது.

ஆர்பிஐ ஆளுனர் தலைமையிலான நாணய கொள்கை கூட்ட அறிவிப்பு இன்று வெளியானது. அதில் வங்கியில் வாங்கிய கடன்களுக்கான தவணை செலுத்துவதில் 3 மாதங்களுக்குச் சலுகை வழங்கப்பட்டுள்ளது.

கொரோனா வைரஸ் தாக்குதலால் ஏற்பட்ட பொருளாதார சரிவை சமாளித்து பண புழக்கத்தை அதிகரிக்க, ஆர்பிஐ ரெப்போ வட்டி விகிதத்தை 0.75 சதவீதம் வரை குறைத்துள்ளது. இதனால் ரெப்போ வட்டி விகிதம் 4.4 சதவீதமாகக் குறைந்துள்ளது. வீட்டுக் கடன், வாகன கடன் போன்ற வங்கி கடன் திட்டங்களின் வட்டி விகிதம் எல்லாம் இதனால் குறையும்.

ஆனால், வாடிக்கையாளர்கள் வங்கிகள் வைத்துள்ள சேமிப்புகளுக்கான வட்டி விகிதம் குறைந்து லாபமும் குறையும் என்பது குறிப்பிடத்தக்கது.

வணிக வங்கிகளிடம் ஆர்பிஐ பெற்ற கடனை, திருப்பி செலுத்த வேண்டிய வட்டி விகிதத்தை 0.90 சதவீதம் வரை குறைத்துள்ளனர். இதனால் ரிவர்ஸ் ரெப்போ வட்டி விகிதம் 4 சதவீதமாக உள்ளது.

முக்கிய சலுகைகள் மற்றும் அறிவிப்புகள்:

1) கொரோனாவால் ஏற்பட்ட பொருளாதார பாதிப்பை கவனித்து வருகிறோம்.

2) வீட்டுக்கடன், வாகன கடன் திட்டம் போன்றவை மீதான வட்டி விகிதம் குறைப்பு.

3) ரெப்போ வட்டி விகிதம் 4.4 சதவீதமாக குறைப்பு.

4) ரெப்போ வட்டி விகிதம் 5.15 சதவீதத்தில் இருந்து 4.40 சதவீதமாக குறைப்பு.

5) பொருளாதார ஸ்திரத்தன்மையை காக்கும் வரையில் செயல்பட்டு வருகிறோம்.

6) பொருளாதார வீழ்ச்சியை தடுக்க அரசு பல்வேறு நடவடிக்கைகளை எடுத்து வருகிறது.

7) ரிவர்ஸ் ரெப்போ வட்டி விகிதம் 4.9 சதவிதத்திலிருந்து 4 சதவீதமாக குறைப்பு.

8) உலக அளவிலான பொருளாதார வலர்ச்சி 20 ஆண்டுகள் இல்லாத அளவுக்கு சரிவு என கணிப்பு.

9)  பணவீக்க விகிதம் கட்டுக்குள் இருப்பதை ரிசர்வ் வங்கி உறுதிபடுத்தும்.

10) தொழில்துறையினர் பெற்ற கடன்கள் மீதான வட்டியும் குறைய வாய்ப்பு.

11) வட்டி குறைப்பு காரணமாக, மாத தவணைகளின் தொகையும் குறையும்.

12) ஆர்பிஐ ஊழியர்கள் 150 பேர் தனிமைப்படுத்தப்பட்டுள்ளனர்.